നീ ഭൂമിയിൽ പതിക്കും മുൻപ് ആദ്യം തൊട്ടതൊരു യോനിയിൽ , ആദ്യം കുടിച്ചതൊരു മുലയും ..

നീ ഭൂമിയിൽ പതിക്കും മുൻപ് ആദ്യം 
തൊട്ടതൊരു യോനിയിൽ , 
ആദ്യം കുടിച്ചതൊരു മുലയും .. 
അമ്മക്കില്ലാത്ത എന്താണ് നീ അവളിൽ കാണുന്നത് ..
നിൻ കാമകണ്ണിൽ നിന്നെ ഇത്ര മേൽ ത്രസിപ്പിക്കുവാൻ
എന്താണ് ഒരുവളിൽ ഉള്ളത് ..

പെണ്ണിൻ ശരീരമെന്നാൽ
നിൻ തുപ്പൽ ഏറ്റ് വാങ്ങാനുള്ള കോളാമ്പിയല്ല ..
നിൻ ആട്ടിയകറ്റലിൻ ഗർജിക്കാനുള്ള സ്ഥലവുമല്ല ..
നിൻ ഭാവന തീർക്കാനും , കൊടും ക്രൂരമായ
പ്രവർത്തികൾ ചെയ്യാനുമുള്ള വൃക്ഷവുമല്ല ..
പെണ്ണിൻ ശരീരം അഭിമാനമാണ് ,
കണ്ണ് തുറന്നാൽ നിനക്ക് കാണാനാകും ..

ആര്‍ത്തവത്തിനു മുന്‍പുള്ള ഒരു പെണ്ണിൻ ശാരീരികാവസ്ഥ വിശുദ്ധമാണ്  ..
അതിന് ശേഷം
അവളുടെ ശരീരം ചുവപ്പാൽ അശുദ്ധമാകുന്നത്
അടുത്ത തലമുറയെ ഉല്‍പാദിപ്പിക്കാനായി
അവളുടെ ശരീരം തയ്യാറെടുക്കുന്ന സമയമാണ് ..

ദൈവത്തിന്‍ മുന്‍പില്‍
പെണ്ണ് ആണിനേക്കാൾ ഒരു പടി ശ്രേഷ്ട്ടയാണ് ..
അതിനാലാണ് ജീവന്‍റെ തുടിപ്പിനെ ഏറ്റ് വാങ്ങാനും
ഒരു പോറല്‍പോലുമേല്‍പ്പിക്കാതെ ചുമന്ന് നടക്കാനും നൊന്ത് പ്രസവിച്ച് മുലയൂട്ടി വളര്‍ത്താനും
പെണ്ണിനെ ഏല്‍പ്പിച്ചത് ..

ഒരു പെണ്ണാണ് നിൻ ശരീരത്തിനും ജീവനും പുറമേ
ഒരു മനുഷ്യനെന്ന നിലയില്‍
നിൻ വ്യക്തിത്വവും സ്വഭാവും രൂപപെടുത്തുന്നതില്‍ പ്രധാന പങ്ക് വഹിക്കുന്നത് ..

പെണ്ണിൻ ശരീരം കൊത്തിവലിച്ചവനും ,
പെണ്ണിൻ മാംസം നുണയുമ്പോഴും ,
അത് കണ്ടാസ്വദിക്കുമ്പോഴും മറന്ന് പോകുന്ന ഒന്നുണ്ട് ..
പെണ്ണിൻ ശരീരം ആസ്വദിക്കുമ്പോൾ ,
പിച്ചിയെറിയുമ്പോൾ , തോറ്റു പോകുന്നത്
നിനക്ക്  ജന്മം നൽകിയ മാതൃ ഹൃദയമാണെന്നും ,
ആ അമ്മ മനമാണെന്നും ..

നിനക്ക് ഇനി ഒരു പെണ്ണുമായി തുല്ല്യത വരണമെങ്കില്‍
നീ അവളിലേക്കാൾ മൂന്നുപടി മുകളിൽ കയറണം ..
ഗര്‍ഭധാരണം , പ്രസവം , മുലയൂട്ടല്‍ ..
അതിനുള്ള ക്ഷമയും സഹനശക്തിയും നിനക്കില്ല ..

പെണ്ണിൻ ശരീരമെന്നത്
ചൂഷണം ചെയ്യപ്പെടേണ്ടതല്ലെന്നും ,
പെണ്ണെന്നാൽ ലൈംഗികതയ്ക്കുള്ള ഒരു ഉപകരണം മാത്രമല്ലെന്നും മനസ്സിലാക്കി
ആണിന് പെണ്ണിനെ കുറിച്ചുള്ള  ധാരണയും മാറണം ..

ഒരുവളോട്
നിനക്ക് അടക്കം വേണം , ഒതുക്കം വേണം
എന്ന് മാത്രമല്ല പറഞ്ഞ് കൊടുക്കേണ്ടത് ,
ആണിനോട് പറഞ്ഞ് കൊടുക്കണം
പെണ്ണിനെ ഒതുക്കത്തിൽ കിട്ടിയാൽ
കീഴടക്കാൻ ഉള്ളതല്ല എന്ന് ..

ഒരുവളോട്,  നീ പെണ്ണാണ് പെണ്ണാണ് എന്ന്
നിരന്തരം ഓർമ്മിപ്പിക്കും മുൻപ്
ആൺമക്കളോട് ഒരിക്കലെങ്കിലും പറഞ്ഞ് കൊടുക്കണം ,
നിങ്ങൾ ആണുങ്ങളാണെന്നും ,
പെണ്ണെന്നാൽ സഹജീവിയാണെന്നും
അവളൊരു മാംസം മാത്രമല്ലെന്നും ഓർമ്മിപ്പിക്കുക ..

എന്തെന്നാൽ ഏതൊരു പെണ്ണും
നാളെയൊരിക്കല്‍ ഒരമ്മയാവേണ്ടതാവാണ് ,
അമ്മക്ക് തുല്ല്യം അമ്മ മാത്രമേയൊള്ളൂ എന്നറിയുക ,
ഏതൊരു സ്ത്രീയോടും സംസാരിക്കുമ്പോഴും ,
പെരുമാറുമ്പോഴും ബഹുമാനത്തോടും
സ്നേഹത്തോടും സംസാരിക്കാനും
പെരുമാറാനും ശ്രമിക്കുക ..

പലപ്പോഴും സ്ത്രീ എന്നതിനെ
ബഹുമാനിക്കാൻ പഠിച്ചില്ലെങ്കിലും അപമാനിക്കാതിരിക്കാൻ പഠിക്കുക .. !